Eibarko Udalak Harrotasunaren Eguna ospatuko du jardueraz betetako egitarau batekin
Argazkian, Sonia Archeli, Berdintasuneko zinegotzia, eta Andoni Zabala, Kultura zinegotzia.
Lehen aldia da sail Kultura eta Berdintasun sailak elkartzen direla Harrotasunaren Eguna ospatzeko, merezi duen garrantzia emateko helburuz. Ekainaren 28ko ekitaldiez gain, hilaren 27an "Ni naiz naizena" izeneko erakusketa egingo da Andretxean.
Harrotasunaren Egunaren ospakizunen harira, Eibarko Udalak ekitaldi sorta bat antolatu du eguna ospatu eta LGTBIQ+ komunitateari babesa emateko. Egun koloretsua izango da, inklusioz eta entretenimenduz betea, eta jarduerak egongo dira egun osoan zehar, Untzaga plazan. Horretarako, azken hilabeteetan Kultura, Jai eta Berdintasun sailek elkarrekin lan egin dute eguna antolatzeko.
Jon Iraola Eibarko alkateak eibartarrak gonbidatu ditu Harrotasunaren Eguna ospatzeko antolatu diren ekitaldietan parte hartzera. Egunaren garrantzia nabarmendu du, eta azpimarratu du funtsezkoa dela dibertsitatea aitortu eta errespetatzeko, bai eta pertsona guztien eskubide-berdintasuna sustatzeko ere.
Halaber, Sonia Archeli Berdintasun zinegotziak adierazi duenez, “herritarren parte-hartzea funtsezkoa da LGTBIQ+ komunitatea ikusarazteko eta laguntzeko, aurre egin beharreko erronken eta arazoen inguruan gizartea hezteko eta kontzientziatzeko, eta berdintasunaren eta eskubide-berdintasunaren aldeko borroka denon kontu bat dela erakusteko".
Goizean, 11:00etatik 13:00etara, “Aniztasunak aberasten gaitu” izeneko tailerra egongo da, LGTBIQ+ pankartak egiteko. Tailerrean aniztasunarekin eta LGTBIQ+ komunitatearen eskubideekin bat egin nahi duten guztiek parte hartu ahalko dute. Aukera ezin hobea izango da herritarrak elkartzeko eta inklusiozko eta errespetuzko mezuak sortzeko. Mezu horiek plazan erakutsiko dira.
13:00etan, Untzaga plazan baita ere, LGTBIQ+ bandera igoko da. Ekitaldi sinboliko horretan herriko agintariak eta komunitateko kideak egongo dira, eta bandera altxatuko dute harrotasunaren, ikusgaitasunaren eta pertsona guztien eskubideen aldarrikapenaren ikur gisa, edozein dela ere haien sexu-orientazioa edo genero-identitatea. Jarraian, komunikatua irakurri eta elkarretaratzea egingo da.
Egunari jai-giroko amaiera emateko, 22:00etan, Untzaga plaza musikaz eta alaitasunez beteko da Asier Bilbao Show ikuskizunarekin. Entretenimenduz eta energiaz betetako gaua izatea espero da, aniztasuna eta norbera izatearen askatasuna ospatzen dituen emanaldi batekin.
Eibarko Udalak eibartar guztiak gonbidatzen ditu ekitaldi hauekin bat egitera eta harrotasun, errespetu eta dibertsitatearen ospakizun-egun bat partekatzera. Era honetako jarduerekin, Eibarrek berretsi egiten du bere konpromisoa berdintasunarekin eta LGTBIQ+ komunitatearekin.
