Pagaegiko obrak amaitzear daude
Pagaegi kaleko artxiboko irudia.
Pintatzea falta da eta Estaziño kaleko bidegurutzea egitea. Lan horiek abuztuan egingo dira. Une honetan Estaziño kaleko etxebizitzak eraikitzen ari dira, eta ingurua eta espaloiak urbanizatzen.
Hainbat hilabetez lanean aritu ondoren, amaitzen ari dira Pagaegi eta Jardiñeta kaleen arteko eremuko urbanizazio-obrak. Obra hauek beharrezkoak izan dira auzoko azpiegitura eta irisgarritasuna hobetzeko. Besteak beste, euste-horma bat amaitu da, arrapala erosoagoak egin dira eta espaloi berriak eraiki dira Jardiñetako igoeran.
Amaitu berri den euste-hormak inguruko lurraren egonkortasuna bermatzeaz gain, sarbide segurua errazten du arrapala eta espaloi berrien bidez, eta oinezkoen eta ibilgailuen mugikortasuna nabarmen hobetzen du.
Aldi berean, Iberdrolaren linea elektrikoak lizentziapean konektatzeko zangak egin dira, Pagaegi kaleko aparkalekuaren inguruan. Era berean, hondeaketa-lan hauek aprobetxatuta, kale bereko 3. eta 7. zenbakien artean euri-uren kanalizazioaren tarte bat osatu zen. Lan horri esker, orain euri-urak eta ur beltzak bereizteko sistema bat dago kale osoan, zeinak hondakin- eta euri-uren kudeaketa hobetzeaz gain, eremuaren ingurumen-iraunkortasunari lagundu dion.
Aurrerapen horiek eginda ere, Estaziño kaleko pintura-lanak eta bidegurutzea egiteke daude oraindik, eta abuztuan egingo dira.
Bestalde, une honetan Pagaegi kalea urbanizatzen ari dira eta espaloiak eraikitzen, Estaziño kaleko etxebizitzei dagokien tartean. Obra horiek inguruko hiri-azpiegitura hobetzeko plan integralaren parte dira, helburua izanik inguruko bizilagunei ingurune seguruagoa eta irisgarriagoa eskaintzea. Gainera, urbanizazio berriak erritmo onean ari da aurrera egiten. Eraikitzen ari diren etxebizitzen lehen fasea ia amaituta dago eta dagoeneko ikus daiteke etorkizunean Pagaegi eta Estaziño kaleak batuko dituen kale berria.