Aurten ere Koreako kulturan murgiltzeko aukera izango da Mika Fest jaiarekin
Mika Fest jaia aurkezteko egin den prentsaurrekoaren irudia.
Mika Fest ekitaldia irailaren 14an egingo da berriz. Euskadin aitzindaria den ekimenak “Korear Olatu” edo “Hllyu” ospetsuan murgilduko du herria.
Berriz ere Eibarrera itzuliko da kultura korearrari buruzko Mika jaia, hilaren 14an. Ekimena Eibarko Udaleko Kultura Sailak antolatu du, Álex Robleño "Alxshow" influencerrarekin eta Euri dantza taldearekin elkarlanean, eta mundu mailan ospetsu egin diren Hego Koreako kulturaren hainbat adierazpide ikusarazi nahi ditu.
Mika Fest dantza asiarraren eta cover dance-aren jarraitzaileei eta fenomeno kultural horri buruz gehiago jakin nahi duten guztiei zuzenduta dago bereziki. Cover-dance hori koreografia popularrak imitatzean edo egokitzean datza. Ekitaldia Coliseo antzokian egingo da 16:00etatik 21:30era, eta Errebal Plazan jarriko den pantaila erraldoi baten bidez ere jarraitu ahal izango da; ondoren afterparty bat egingo da.
Iaz, Mika Fest jaialdiak arrakasta handia izan zuen, eta aurten aurreikuspenak gainditzea espero da; bertan izango dira, besteak beste, Austin Pak koreografo, dantzari profesional eta Seulgo 1Million eskola ospetsuko irakaslea, Jessi, Jimin, B.I eta Jay Park bezalako artista ospetsuekin lan egin duena. June Higuera Bilboko Euri Danceko eta Kpop-eko dantza irakasleak ere parte hartuko du. Junek 15 urterekin jada nazioarteko artistekin partekatzen zuen agertokia, hala nola Azealia Banks rap-abeslariarekin. Hirugarren epaile bat ere egongo da, baina oraindik zehaztu gabe dago zein izango den.
Coliseo Antzokiko ateak 15:45ean irekiko dira parte-hartzaileei harrera egiteko, eta publiko orokorra 16:00etatik aurrera sartu ahal izango da. Dantza-lehiaketa 16:30etan hasiko da eta, egunari emozioa gehitzeko, Kibak aurkeztuko du.
Ekitaldi nagusiaz gain, Mika Festek pintxo asiarren ibilbide gastronomiko bat antolatu du Eibarko 13 tabernatan; hala, ostegunetik igandera bitartean, Asiako sukaldaritzan inspiratutako zapore paregabeez gozatzeko aukera izango da.
Mika Fest 2024 jaialdiak Hego Koreako kulturaren aberastasuna eta aniztasuna ikusarazteko jai bat izan nahi du, eta Eibarren K-poparen eta dantzaren zaleak eta Olatu Korearrean murgildu nahi dutenak erakarri.